June 3, 2020

Padayon ang ginahimong aksiyon sa Metro Kidapawan Water District arun masolusyunan dayon ang kakulangan sa suplay sa tubig karong panahona. Nagpulong gahapong adlawa (June 2, 2020) ang MKWD management nga gipangunahan ni GM Stella M. Gonzales, ug Kidapawan City LGU nga girepresentar ni Mayor Joseph A. Evangelista. Gipresentar ni GM Gonzales ang kamatuoran luyo sa ginakasinating kakulangan sa supply sa tubig nga sa kasamtangan ginatrabaho na sa MKWD, ug gikinahanglan niini ang suporta sa LGU niining mga panahuna sa pagimplementar ug mga hinanaling solusyon.

Tungod sa hiniusang katuyuan sa duha ka buhatan sa gobyerno nga maserbisyohan ang katawhan, samtang ginaayo pa ang Saguing source, nauyunan ang mga hinanaling kasabutan nga musunod:

1. Pag-activate sa MKWD sa Box-B sa Ilian water source arun masuplayan na ang East portion sa Kidapawan. Kini makaserbisyo sa mga residente gikan Nuangan hangtud sa Barangay Singao apil na pud niini ang ubang bahin sa poblacion.
2. Mag-coordinate ang City LGU sa Philippine Red Cross arun magamit and duha nila ka water trucks para sa pagdistribute sa tubig sa mga apektadong lugar.
3. Ginahulat na lamang sa City LGU ang kumpirmasyon sa Apo Agua nga mamahimong makatabang sa pagrasyon ug tubig sa mga apektadong lugar
4. Pagmintina ug hugot nga koordinasyon ug pagtutok sa City LGU- MKWD partnership pinaagi sa duha ka opisyales sa matag buhatan; si Psalmer Bernalte (CDRRMO head) ang murepresentar sa City LGU ug si Engr. Elben Daquipa pud sa bahin sa MKWD arun sa mas organisado ug hapsay nga distribusyon sa tubig.
5. Pagadumalahan sa MKWD ang Incidence Command Center.

Sa laing bahin, nagpadayag pud ug suporta sa MKWD si Dr. Erwin Palmones pinaagi sa paghatag ug 200 ka “Tahiti” nga makatabang ug daku sa “Slope Protection Program”. Magpahulam pud ug Water Truck ang Cotabato Provincial Engineering Office nga gipanguluhan ni Acting Provincial Engineer Domingo D. Doyongan, Jr.

Ginapasalamatan ang inyong bililhung pagsabot ug makanunayong suporta sa atoang MKWD.