Puno sa nasudnong garbo, nagsul-ob sa ilang mga barong ug Filpiniana-inspired nga mga attire ang mga opisyales ug empleyado sa Metro Kidapawan Water District (MKWD) sa ilang Monthly Convocation nga gipahigayon sa ikatulong Lunes sa bulan sa Pebrero 2025.

Ang pagsul-ob niini, nagbase sa gipagawas nga Revised Dress Code sa Civil Service Commission (CSC) para sa mga nagtrabaho sa gobyerno nga nagapatigayon sa ilang mga opisyal nga katungdanan, sumala sa CSC Resolution No. 24000766 (Policies on Flexible Work Arrangements in Government) nga gimantala niadtong 29 Agosto 2024.

Ang katuyu-an sa guidelines sa Revised Dress Code for Government Officials and Employees nga gipahimutang sa CSC Memorandum Circular No. 16, s. 2024, mao ang pagpauswag sa morale, professionalism, ug productivity sa mga opisyales ug empleyado sa tanang ahensya sa gobyerno, government-owned and controlled corporations, local government units, state universities ug colleges, bisan pa man kini appointive o elective.

Sumala sa mga nakalatad nga Dress Code guidelines, sa unang Lunes sa matag bulan, ang tanang empleyado sa gobyerno magsul-ob ug ASEAN-inspired attire, pinasubay sa mga traditional garments sa mga nasud nga myembro sa ASEAN, nga kung asa ang Pilipinas usa usab ka aktibong myembro.

Sa ikaduha hangtod sa ika-upat nga Lunes sa bulan, ang mga empleyado magsul-ob ug Filipiniana-inspired clothing gamit ang Philippine Tropical Fabrics nga nisalamin sa kultura, heritage, ug mga customs sa Pilipinas.

Martes hangtod Huwebes, ug sa weekends, ang mga empleyado magsul-ob sa opisyal nga uniform nga gi-prescribe sa ilang ahensya, ug smart casual attire sa mga adlaw nga dili sila mag-uniporme.