Hulyo 18, 2024, gihimo ang pagpirma sa Memorandum of Agreement (MOA) tali sa MKWD ug 4Bs’ CADT kalabot sa paggamit sa Matiboggo Source sa Buenavida, Makilala. Kahinumduman nga niadtong Enero 12, 2024, nanagtigom ang mga representante sa Bagobo-Tagabawa Indigenous Cultural Community/Indigenous Peoples (ICC/IP) alang sa Free, Prior, and Informed Consent (FPIC) process nga gi-facilitate sa National Commission on Indigenous Peoples (NCIP) diin gitambungan usab kini sa MKWD. Dangtan ang unom ka-bulan gikan ni-adtong petsaha, bug-os na nga napanday ang MOA alang sa Proyekto sa Matiboggo Water Source kauban ang tribung Bagobo-Tagabawa sa Barangay Biangan, Buhay, Buenavida, ug Batasan, ang Metro Kidapawan Water District (MKWD), ug ang National Commission on Indigenous Peoples (NCIP). Human gipahigayon sa mga tribal leaders ang ritwal sa Pamaas, gipresenta ni NCIP Provincial Officer Jayme James M. Ramirez ang rationale mahitungod sa kultural nga kasinati-an sa Matiboggo water source ug ang kamahinungdanon niini diha sa komunidad sa Bagobo-Tagabawa. Gipresenta usab ni NCIP Legal Officer Ivyrose B. Paz ang nakalatid sa MOA aron sa pagpatin-aw sa mga kasabutan nga nalakip niini inubanan sa paghisgot sa mga obligasyon ug responsibilidad sa mga hingtungdan alang sa responsable nga pagdumala ug malungtaron nga paggamit sa Matiboggo water source. Ang effectivity sa MOA, sumala pa kang Atty. Paz, magsugod human sa paggawas sa Certificate Precondition (CP) sa NCIP National Office. Ang CP mamahimong balido sulod sa baynte-singko ka tuig. Ang MOA gipirmahan ni Matanam Jaime M. Odo, Sr. Head Claimant sa Brgy. Buenavida, Makilala, Cotabato, mga myembro sa ICC/IP sa maong lugar ug ni GM Atty. William M. Angos, CPA alang sa MKWD. Kining mahinungdanon nga panghitabo gisaksihan sa mga Head Claimants sa 4B’s CADT: Matanam Bienvenido G. Macalos (Batasan), Matanam Mercado E. Padaya (Biangan) ug Matanam Rama I. Lopez (Buhay). Matud pa ni GM Angos, ang ilang mga buluhaton wala matapos sa pagpirma sa MOA tungod aduna pay mga rekisitos nga kinahanglan himuon aron hingpit nga masugdan ang Matiboggo Water Source Project. Iyang gisaad nga himuon sa buhatan sa MKWD ang tanang pamaagi aron mahuman kini dili pa muabot ang bulan sa Hunyo sa sunod nga tuig. Ang implementasyon puhon sa Matiboggo Water Source Project, ubos sa Local Water Utilities Administration/Asian Development Bank (LWUA/ADB) muresulta sa abunda nga suplay sa tubig sa mga residente sa Brgy. Buhay, Brgy. Buenavida, Brgy. Poblacion, Brgy. New Cebu, Brgy. Garsika, Brgy. Taluntalunan, ug Brgy. Sta. Felomina sa Munisipalidad sa Makilala. –jbo/PRU