Gipa-ubsan duol 50% ang application fee alang sa mga buot magpataod ug new connection sa Metro Kidapawan Water District.

Mao kini ang gibutyag ni Atty. William M. Angos, CPA, general manager sa MKWD sa iyang pagtambong sa 120th Regular Session sa Sangguniang Panglungsod sa Kidapawan City niadtong November 14, 2024.
Kini human giduso sa MKWD management ang ilang rekomendasyon ngadto sa Board of Directors sa pagpakunhod sa application fee sa new connection human mapahigayon ang mga masusi nga pagtu-on kabahin niini nga hilisgutan.

Sumala pa ni GM Angos, walay paglangan nga giaprubahan sa MKWD Board of Directors atol sa ilang board meeting niadtong November 12, 2024 ang Board Resolution No. 179, S. 2024 nga magpa-ubos ug hapit singkwenta porsyento (50%) sa application fee sa mga magpataod ug new water service connection.

Tumong nining maong resolusyon nga dili mamahimong babag ang kataas sa balayrunon sa application fee aron mapahimulos ang katawhan sa serbisyo sa MKWD pinaagi sa pagpataod ug linya sa tubig.

Ang pagpatuman sa Board Resolution No.179 nagsugod niadtong November 13, 2024.